I mììs de l'an

Giünèè cunt la sua nììf

al fa tütt bèl gualììf.

Febrée a pitìn a pitìn

dì 'l sa slunga 'n mumentìn.

Maars, an poo fulèt:

sa scumencia a mööf i ranghèt.

Abrìì de trenta dì,

l'è ura de rinverdì.

Santa Cruus ai trìì de Macc

sa và sü ai praa a mèt giù 'l cuàcc.

L'è scià Giügn cunt pochi pagn

e la fa pasà la metà de tücc i agn.

Lüi: al suu ciamàa leuñ

quai volt al fa vegnì catif anca quìì buñ.

Agust, utaf fradel

al scürta ' dì de 'n bèl tuchel.

Setembri, anca senza 'l priuu,

i descarga munt i nos pastuu.

Utubri, Utubrìñ,

'n de la tina sa fa 'l viñ

E Nuembri l'è urmai scià

a fan pensà al munt de là.

L'è già Disembri : an funta n funt

l'è amò bèl stach a 'stò munt .

Firmino Fistolera